古天后日誌｜中港兩地股市乏善可陳 期結前耐心等待

5月26日，多雲，早段局部地區有薄霧，有幾陣驟雨，部份時間有陽光。隔晚美國繼續反覆，早段因為經濟數據表現未如理想，美國4月份耐用品訂單由前一個月經調整後升0.6%，放緩至增0.4%，低過市場預期0.6%。撇除運輸設備訂單則升0.3%，同樣低過預期，三大指數曾下跌。

其後美國聯儲局公布議息會議紀錄，該局計劃以市場預期更快的速度加息。聯儲局會議紀錄指出，多數官員支持未來幾次會議分別加息50點子，並強調了對恢復價格穩定嘅決心，認為限制性貨幣政策係合適。另外，所有聯儲局官員均支持開始縮減資產負債表，而少數官員提到縮表對美國國債市場流動性風險。市場早有心理準備美國接住幾次會議會加息50點子，未見聯儲局將每次加息增至75點子，市場認為加息幅度合理，仍然喺預期之內，美股轉跌為升，三大指數全線向上。

標指有13%下跌空間
 
美股近期反覆嘅走勢，反映美股仍然喺熊市中運行，而繼續有大行分析睇淡美股，大摩首席美股策略師Michael Wilson最新警告，目前看跌美股的情緒正蔓延，由於經濟增長的風險才剛顯現，料夏季跌勢會更急，標指未來3個月或下試3400點，意味較現水平有13%下跌空間。巴克萊亦警告，全球互惠基金年內恐進一步拋售3500億美元股票，並指呢個月嗰啲基金已成為股票淨賣家，為2020年8月以來首見。不過近日美企公布業績後，股價盤後急跌嘅情況增加，隔晚輪到半導體龍頭NVDA盤後急跌，講到底又係估值問題。
 
至於中港兩地股市，基本上日升日跌已成常態，市場缺水之下，無人願意入場，而要沽貨嘅亦沽得七七八八，維持買賣兩閒局面。不過近日阿爺頻頻出招，個別行業有政策出台，不時又出口術，似乎唔想兩地股市過份疲軟。只係市場缺乏新資金入場，阿爺即使想個市走高，亦只有得個想字，加上下周一期指結算，港股更乏方向，期結前轉倉，指數喺幾百點內上落，根本乏善可陳，呢啲日子就只有耐心等待。要記住機會係等出嚟嘅，並唔係胡亂炒作，追升追跌夾硬炒出嚟嘅。

古天后

(徐狄怡，證監會持牌人)

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。