古天后日誌｜港股隨美股反覆 現水平上博空間有限

5月23日，多雲，有幾陣驟雨，間中有幾陣強風。上周五美股表現反覆，道指高開後曾倒跌逾600點，至尾市三大指數收復失地，道指回升8點；標指升不足1點；納指則跌33點。目前三大指數均跌至支持位守住，而虛擬貨幣亦見回升，似乎資金避險情緒略減，問題係有幾多資金願意入場。預計美股表現仍反覆，主要睇資金流動性會否喺6月聯儲局縮表後受影響，暫時古天后對美股後市預測仍然較為保守。

至於港股於月初曾至19200水平後反彈，呈現雙底回升形態，可惜入市資金一直唔多夠，暫時反彈阻力都係20800至21200較大。目前大市喺20600點水平，似乎向上值博率已大減，大市美股表現反覆，日上日落，下周一期指結算，既然月底已成功捕捉一輪調整，古天后亦有建議喺19200水平入貨，目前好應該分段食糊鎖定利潤去迎接6月來臨。

恒地大型項目或成股價催化劑

大市由月初見咗19200點水平上返嚟，主要都係由一堆重磅科網股帶動，但唔覺唔覺其實本地本產股亦由低位升返唔少上嚟。雖然美國息率趨升，加上早前第五波疫情，確係令本港樓市表現較為疲軟，但始終本地住房需求遠超過供應，喺剛性需求下，本地一手樓嘅市場唔會差得去邊。隨住疫情受控緩和，發展商最近又開始陸續推新盤，而第一季積聚嘅購買力，一下子又再釋放出嚟，近期嘅新盤一推出市場，都火速售罄。

恒地(00012)最快會喺下個月推出近30年以嚟，最大嘅市區舊樓重建計劃，上星期該項目已正式命名為「必嘉坊Baker Circle」。呢個項目由最初收樓至今，已歷時超過20年，整個重建計劃合共分為8個地盤，總樓面面積逾100萬平方呎，將提供約2800個住宅單位，並按三期分段推出市場，並且享有999年地契嘅優勢。

而呢個項目特別之處，係橫跨咗紅磡南嘅機利士南路、必嘉街、黃埔街、寶其利街，將呢幾條街打造為一個設計獨特、樓面面積約168,000平方呎嘅立體商業步行街，恒地想將該區打造成另一個吃喝玩樂新蒲點。而最近港鐵東鐵線過海段已正式通車，令紅磡區成為全港交通樞紐嘅重要角色，而「必嘉坊Baker Circle」項目正正落於紅磡站、何文田站及黃埔站三站之間，可以話佔盡鐵路網絡優勢。

恒地都有一段時間無咁大型嘅項目推出市場，呢個項目落成後，除咗售樓收益之外，未來商業步行街亦會為集團帶嚟可觀嘅租金收益，相信對股東回報有正面刺激。睇返恒地嘅股價走勢，目前喺32元水平附近徘徊，表現相對其他重磅股落後，紅磡項目嘅推出，有機會成為股價短線催化劑，值得留意。

古天后

(徐狄怡，證監會持牌人)

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。