欣宜生酮飲食減磅只為紅館騷 自爆模仿JW搞到尷尬好火滾

鄭欣宜日前接受《StarTalk》訪問，大談相隔四年再開紅館騷的感受，她說：「今次多咗時間準備自己，狀態好，所以希望可以去到盡，冇底線！上次開騷斷咗腳，好多嘢要就住就住，驚會整傷，今次冇呢啲憂慮，我會盡情投入，就算唔甩肺，都甩啲底褲啩！哈哈！」

 

欣宜為個唱清減不少，但坦言完騷後不會再生酮飲食。

 

談到為個唱清減不少，但之前唱過不少如《你瘦夠了嗎？》、《女神》、《@princejoyce》及《豐乳肥臀》等歌曲，變相換來被攻擊，欣宜說：「其實最肥、最瘦或者依家，我都鍾意着靚衫，但好傷心冇我Size，而且減肥係為自己台上表演的狀態，我做咗好多體能練習、打拳，所以自然會清減。另外我之前唱過的歌，講過的所有嘢，我意思係It's my body. I can do whatever I want. You can too. 就係咁簡單，最緊要都係健康，同埋我完咗演唱會唔會再生酮，因為我真係好鍾意食粥粉麵飯！」

 

欣宜遺憾因疫情，未能到加拿大見證好友鄧小巧（左）的婚禮。

 

此外，欣宜遺憾因疫情未能親身到加拿大見證好友鄧小巧的婚禮，她分享一件與JW、許廷鏗（Alfred）及林欣彤食飯的趣事：「Alfred叫我喺JW面前扮JW把聲講嘢，我扮完之後自己覺得好似，但JW話唔似，氣氛好尷尬。點知幾星期後，JW無啦啦Message我，話佢聽返自己嘅Voice Message，覺得原來我扮得好似，你話我係咪火滾！搞到我好尷尬。」

 

欣宜講起許廷鏗要她扮JW（左）把聲講嘢的尷尬事，話好火滾。

 

 

更多新冠疫情資訊，請到以下專頁瀏覽（按此）

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。