青春不要臉｜丁子朗李小龍上身晒彈跳力 戴祖儀「硬食」蛋糕

勵志熱血青春喜劇《青春不要臉》前晚及昨晚兩集焦點，落在丁子朗（丁丁）飾演的齊輕舟及戴祖儀（Joey）飾演的溫楚瑜身上。憑這劇被讚演技大有進步的丁丁，原來亦相當打得，先後在化妝舞會中「大腳屹起」勇擒色魔，再在波樓內以一敵十、潛行枱底避開幾十碌桌球棍，手瓜起腱、腹肌結實之餘，更是身手靈活、彈跳力驚人、出拳及起腳均相當有節奏。

丁子朗既然跳得就跳多幾次。

 問到丁丁為何如此好身手時，他笑言：「好彩有好好嘅龍虎舞師傍住我，先完成到呢場戲。我都好鍾意拍打戲，好鍾意武術。呢場戲拍之前其實排咗兩個月度，咁我拍之前就喺屋企不斷拉筋同練動作，好彩細個有打過功夫，但由於都好耐冇拉筋好硬，嗰時我每日一返到屋企就即刻拉，靠住度門一路將一隻腳撐上去，再一路睇劇本。」談到波樓打鬥戲，監製林肯坦言是想向80年代功夫片致敬：「當時慢慢開始將搞笑元素加入武打片，難度高之餘亦會親身上陣。」

手瓜起腱、腹肌結實，更是身手靈活。

Joey的搶鏡位則在於「犧牲度」及「可愛指數」。在茄哩啡夜店群戲中，Joey飾演的楚瑜不但應導演要求被輕舟揈完上天再掟落地；心地善良的她，因為不想訓練班同學不開心，結果在不是百分百自願情況下，選擇成為被掟蛋糕的下靶角色，結果被輕舟掟到「成面都係」，難得楚瑜依然笑住話冇事；另輕舟為了保住角色，竟撒謊指小瑜有臭狐。小瑜聽到流言後，竟無厘頭地變成「舉手王」，只要見到認識的人就高舉胳肋底力證「清新無味」；由於小瑜高舉腋窩時一臉無辜，加上動作趣怪、表情可愛，成功獲得正評，不但讚Joey演得夠放，亦愛上小瑜善良的性格：「呢幕好好笑」、「諗起《賭聖》嘅綺夢」、「丁子朗好衰，屈戴祖儀有臭狐」。

狂揈戴祖儀。

Joey被屈有臭狐後變舉手王。

在三大場面中，化妝舞會可謂最有睇頭，一眾主角的造型，包括女超人（劉穎鏇）、瑪麗蓮夢露（伍樂怡）、李小龍（丁子朗）及米高積遜（余德丞）等均相當吸睛，色彩繽紛亦各有特色。據知為拍出最好效果，數十名演員於拍攝前個多月已開始練舞，其中飾演妍妹的伍樂怡，及飾演柳德榮的余德丞，原來跳舞完全零天分，排練初期長期手腳僵硬，幸經排舞師多番輔導，最終順利過關。丁子朗受訪時透露，該場戲由下午三點多拍至翌日天光，拍攝認真：「仲要個個Shot都係跳舞同打架，好彩有一班好熱血嘅年青人（台前幕後）一齊去完成呢件事，否則無論心理或生理上都幾難捱；但一班人嘻嘻哈哈咁過，就算非常攰都非常之開心。」另在劇中有不少對手戲的余德丞與伍樂怡，更被大讚搶戲兼有CP感：「好合襯呀！希望TVB會開套劇畀佢哋做男、女主角，畀更多機會佢哋發展。」

呢場大型跳舞場面，排咗足足個幾月，再拍咗至少14小時。

劉穎鏇、伍樂怡嘅女超人同瑪麗蓮夢露造型相當搶鏡。

 立即下載 | 全新《星島頭條》APP : https://bit.ly/3yLrgYZ

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。