陳嘉寶報喜誕下第三位千金 完成壯舉宣佈封肚

陳嘉寶（Anjaylia）月初順利生產再添一女，誕下第三位千金，母女平安；也是香港娛樂圈首位於2022年誕生的星B！Anjaylia的預產期本於去年年尾，但一如媽媽所願，待Anjaylia歡度完聖誕及元旦BB才出世，結果「逾期居留」至本月初出世，BB出生時重7.2磅，並已取名為Azaliah。在誕下Azaliah一刻，Anjaylia感動極了，說：「好感動呀，尤其係醫生將一出嚟嘅BB即刻擺喺我心口俾我抱咗好耐，之前兩個女都冇畀我抱咁耐。啱啱上一刻明明喺個肚入面，突然之間就出咗嚟擺喺心口上面，感覺好神奇。」

Azaliah露出嘴仔好可愛。

揭盅係女嚟。

其實英文名字Azaliah的由來，是Anjaylia與丈夫黃頌祈（Epaphras）深思熟慮、從聖經中找出來的。Anjaylia說：「英文名『Azaliah』係喺聖經入面搵嘅，我知道實會俾人話我哋幫囡囡改嘅名都好難讀，哈哈！其實呢個係一個傳統，因為先生近五代都係基督徒，呢幾代都係會喺聖經裏面搵英文名，我哋都要跟返傳統，其實都搵咗幾個月，搞咗好耐，頭兩個女嘅名Hosanna同Eliana都係有意思嘅，Hosanna嘅意思係asking for God、Eliana嘅意思係God had answered，我想將呢個故事延續落去，Azaliah嘅意思係God has reserved，都有一系列有意思嘅，Azaliah同我個名讀音都好似，就當係送畀自己嘅禮物。中文名就留返畀爺爺同嫲嫲改，中文名都係想向長輩致敬。」

兩位姊姊第一眼看到妹妹Azaliah，各有不同反應，Anjaylia說：「佢哋好鍾意BB。大女完全冇呷醋，自己會同我哋講話『我好鍾意Azaliah』；細女成日想摸佢，不過有少少呷醋，有陣時見我抱BB都會埋嚟叫我抱。」

 

三個夠晒數。

年紀輕輕已為三女之母，Anjaylia也宣佈封肚了！誕下三女後Anjaylia要好好坐月，保養好身體後才繼續向自己夢想進發，為三個女兒做個好榜樣。她說：「啱啱播緊我有份參與ViuTV嘅《IT狗》，等我坐月嘅時候可以睇吓劇輕鬆吓，好開心呀！依家好好調理好身體就有動力做自己想做嘅事。對於BB嘅期望，最緊要係佢哋都健健康康、開心平安，我同先生意向一致，生仔生女都冇所謂，我已經完成一個壯舉，我同先生最大嘅目標係希望有三個小朋友、年紀近啲嘅，可以一齊成長係好開心嘅事，大女同二女一齊玩，大女會識得保護妹妹，二女學嘢都會學得好快，呢個策略成功！」

正所謂三個女人一個墟，估不到Epaphras最享受，Anjaylia說：「又多一個女圍住，佢好唔得閒嘞，我冇乜事就出去先，佢搞掂晒！諗返起老公一知道係女嘅時候，就開咗支靚酒，仲請朋友食飯慶祝，依家生完三個，理想達到嘞！」Anjaylia與老公也保留傳統，每個孩子總會訂製一張被子給女兒作禮物，Azaliah同樣擁有父母送給她的這份傳統小心意，希望女兒平安健康就好！

老公享受又多個女圍住。

此外，早前Anjaylia的一班好友為她舉行gender reveal party，她笑說：「好開心！因為我超級懶，baby shower都唔想搞，亦唔想朋友破費，我只係希望可以同一班好close嘅朋友傾吓偈，食餐飯開心一吓，點知一班朋友就幫我安排好呢個party，最好笑係其實自己同老公、一班朋友一早已經知道BB性別，但大家為幫我一嘗心願，畀機會我篤波波（揭露BB性別的儀式），過一過癮，真係好sweet。」

一班好友為她舉行gender reveal party。

可以同一班好close嘅朋友傾吓偈食吓飯就很開心。

立即下載 | 全新《星島頭條》APP : https://bit.ly/3yLrgYZ

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。