樂為蘇永康拍MV 張繼聰自爆已暗暗淡出樂壇

蘇永康新歌《ALL THAT JAZZ》MV將於下周一新鮮出爐,今次特別請了好友張繼聰助陣拍攝,阿聰自爆是蘇康忠實Fans,求學時期考試靠唱對方hit歌攞分,更被讚揀歌有taste!如今二人已為人父,每次相見必暢談仔女經,今次MV阿聰與小演員做對手戲,大施氹仔功,令小朋友乖乖演出!

MV除了有張繼聰、小演員,還有扮演媽咪的胡琳,這首歌是講及父子情及家庭樂,在MV中阿聰有個幸褔家庭,已為人父的他與兒子玩成一片、做運動、扮唱歌等,與小演員做對手戲毫無難度,因為他對氹小朋友特別有一手,更不時流露出一副慈父相教小演員演出,令拍攝進度火速完成!

阿聰好開心再有機會拍MV,自言已暗地裏淡出樂壇,今次拍這歌是因為覺得很有意義,相信每個家庭也會有共鳴,歌詞十分有意思,令人反省做父母的是否一定要將自己的一套硬加添在子女身上呢?其實有時做父母可以在子女身上學到很多事,為人父母其實是一門學問!阿聰說:「呢首歌係非主流情歌,不過又好有共鳴,歌詞講父子的成長,用咗音樂嚟表達,仲配有中樂元素,咁又幾好玩!」他謂很期待蘇康與中樂團的演出,但笑謂到時他只會去看不會上台唱歌,因為現在他唱歌會很緊張!阿聰又爆料說:「以前我喺演藝學院讀書時,每次考唱歌都會唱蘇永康的歌,本來老師話我唱歌窄窄哋,不過好在我有taste唱佢啲歌,所以先合格,之後去酒廊唱歌都會唱佢啲歌。」

蘇永康則謂邀請阿聰幫手是因為兩家人好熟,「我見過你個大仔張瞻都幾活潑,你哋嘅相處方法幾有趣,所以搵咗你拍!我個仔只有21個月大,唔知將來相處會唔會好似你哋咁緊扣,所以我將呢個諗法講畀Wyman(黃偉文)知,等佢填歌詞時有啟發,再加上阿聰嘅演繹方法去做。」至於新歌是加入中樂元素,因為他希望嘗試多些不同的音樂,6月他將與中樂團會合作舉行演唱會。

都市網新聞