舊愛小方未放低十年情 Stephy爆喊:有啲心噏!

文:鄺芷瑩
圖:張家宜

 

方力申(Alex)日前表示仍未放得下與鄧麗欣(Stephy)的一段情,昨日Stephy現身新片《女士復仇》開鏡拜神儀式時,坦言自己睇完也有點心噏,更講到眼紅紅又眼濕濕,要頻頻用紙巾拭淚。

鄧麗欣、樂基兒(Gaile)、周秀娜、孫佳君與何傲兒等,昨日出席電影《女士復仇》開鏡禮,適逢前日5月22日是娜姐生日,大會安排壽包為她慶祝。
身穿露肩裝的Stephy透露片中有個專一的老公,後來才發現對方有小三、小四,劇情主要講述她跟樂基兒及周秀娜三個女仔的爭鬥。問到會否打到扯頭髮?她說:「我哋會打得型啲,扯頭髮唔夠型,戲中的我係殺手,會有開槍場面。」

 

溝通問題 無諗復合

 

談到舊愛方力申於電台大談跟她的感情事,不禁落下男兒淚,Stephy說:「我昨日先睇到,因為之前在峇里,係朋友同我講。我自己唔想再講太多兩人之間的事,這段時間想大家丟淡多啲先,專注番工作上,唔好出親嚟大家都關心呢件事。(Alex話對你還有感覺,你對他可有感覺?)我自己睇完都有啲心噏。」她講到此處開始眼紅紅又眼濕濕,隨即落下淚來。
問到是否盡量不會聯絡Alex?Stephy說:「其實唔係好適合再去講,唔係可以好好去表達到。(可會心軟復合?)無諗呢樣嘢。(Alex指冷靜期那段時間先諗結婚?)佢講得好啱,佢話我哋之間唔係結唔結婚的問題,係溝通同timing的問題。其實我覺得有少少奇怪,喺我哋分開之前同之後,好多時在傳媒面前或公開場合先會講呢件事,反而私底下好少會傾,就算將來點都好,都係等我哋慢慢去處理。(Alex表示復合無望,因為已沒有愛?)timing同溝通好重要,愛有好多層次,不一定只係愛情,家人同朋友之間都有愛。」

 

接受新挑戰做小四

 

此外,Gaile笑言自從電影《甜絲絲》後,適逢認識導演火火,對方問她可有興趣參演,便相隔12年後再度拍戲。雖然多年無拍戲,但片酬沒有大增,她說:「今次飾演飛虎隊,所以一條裙都無,又無靚樣,還是飾演小四,不過會有打鬥戲,所以要training,不想不小心打到人。」問到可有試過排名咁低要做小四?她說:「無!今次做啲完全無試過的事,是一個新挑戰。」她又表示現時拍戲、設計及模特兒的工作都會做,想多方面嘗試。
片中扮賊兼是小三的周秀娜,笑言希望可操fit有鋼條身形能夠打得更爽。問到可有試過不知情之下做了小三?她說:「呢部戲先有得試,仲要一試十年都唔知,我覺得呢個男人都幾叻,我都想問吓點解個女人可以咁蠢。(可有勾起你過去不好的回憶?)過咗去就勾唔起,已經埋藏在泥底,我等待新的小苗出嚟。」問到如何慶祝生日?她笑言跟朋友吃足一星期生日飯,還收到追求者所送的禮物。

都市網新聞