張寶欣暗撐胞姐袁偉豪襯到絕 森美大整蠱教佳麗講「我好鹹濕」

森美亂教廣東話,結果4號黃瑋琦(左4)第一個中招。

文:駱震寧 圖:羅安強

 

向來愛整蠱人的森美昨日出席港姐活動,席上竟教不太識中文的佳麗亂講廣東話,當中4號黃瑋琦便中招說出:「我今日好鹹濕」。另外,由於張寶兒早前與袁偉豪傳緋聞,寶兒的妹妹寶欣竟早有準備回應記者,令人不禁懷疑是否張寶兒教她的標準答案。

港姐「決鬥一分鐘」昨日於馬鞍山廣場舉行,大會司儀森美率領10名候選佳麗,於台上分組進行遊戲作比併。森美得知4號黃瑋琦不太識廣東話即整蠱她,笑謂可將「今日天氣好熱」說為「我今日好鹹濕」,黃瑋琦即照着重複。森美笑說:「我只會整蠱佢講『鹹濕』兩個字,到決賽如果佢講『鹹濕嘢』,我一定會制止佢。」

向監製自薦着泳褲

森美是今屆港姐決賽司儀,他笑稱今屆決賽必然很有趣,因當中有兩位佳麗不太懂廣東話。他又稱過去擔任港姐司儀到了泳裝答問會好尷尬。他笑說:「佳麗着泳衣,我就着晒成套西裝,覺得好尷尬,我唔介意答問環節着泳褲。」記者讚他有好身形可着泳褲,他笑說:「叻哥都着過啦!(但當年被投訴喎。)咁我都驚俾人投訴,我怕人覺得肉酸。我同監製自薦着泳褲先,不過會要求加對襪,哈哈!」黃瑋琦坦言不知道「鹹濕」何解,下台後才知道真正含意,但沒有介意被森美整蠱。她笑笑說:「唔緊要,一邊學一邊笑。」

 

口才忽然靈活有可疑

另外,張寶兒被指跟袁偉豪拍拖,問到寶兒的妹妹張寶欣可有其事?曾自言口才不好的她突然連珠爆發說:「我真係唔知,呢個係姐姐嘅私事,都係佢答番好啲。我又唔係佢心入面條蟲,唔知佢諗緊咩。」問是否張寶兒教她回答?她表現得支支吾吾,非常搞笑。張寶欣表示未見過袁偉豪真人,但有看過《打工捱世界II》。問到她可覺得袁偉豪跟姐姐合襯?她笑說:「香港小姐與香港先生,係唔係好襯呀?」

被問到是否姊姊教她回答時,寶欣只懂得傻笑。

大熱之一的黃瑋琦(左)拍籃球 失手。

雷莊皃(左)跟邱晴頂着書本進行比賽平衡力。

都市網新聞